'Each Day A Lie'

[AINARA LeGARDON]

Winslow Lab, 05

Madrilen bizi den euskal jatorrizko musikari bat da Ainara LeGardon. Bost urteko lanaren ondoren, In The Mirror estreineko diskoarekin, bere lekua aldarrikatu eta lortu egin zuen. Bigarrena kaleratu berri du orain, Each Day A Lie izenburu mamitsupean. Lehen entzunaldian sartzen ez diren disko horietakoa da, zenbait unetan ondoan eduki eta laguntzen duena eta etxeko disko kutunen artean betiko izango dena. Hitzak, pertsonalak (The Winter Sun); kantuak, hipnotikoak (Each Day A Lie) eta gogorrak (Dry Years); eta instrumentuek ere hitz egiten dute (A Second Of...). Ez dira nahiko americana eta folk-rock etiketak; berezko estiloa nabaria da. Chris Eckman (The Walkabouts), David Jimenez (A Room With A View) eta Audience taldeko Hannot Mintegia eta Ager Insunza gernikarrek parte hartu dute diskoaren grabaketan. Ekainaren 3an Basaurin arituko da (Bizkaia), Madee seikote katalanarekin batera.

Jon Villapun
http://www.matraka.info